Университетте оқуға түсу және оқу меритократия принциптеріне негізделген, профессормен бірлескен жұмыс пен оқудың алғашқы күнінен бастап зерттеу қызметін қамтиды. Біз жай ғана жаңа университет емеспіз, әлдеқайда дамыған оқу орнымыз. НУ жоғары білім береді және түлектерді жаһандану және технологиялық күйзелістер дәуірінде табысқа жетуге дайындайды. Біздің түлектер жер туралы ғылымдар, цифрлық ғылымдар, мемлекеттік басқару, білім беру, инженерия, медицина және т. б. салада әлемдік деңгейдегі диплом алады.

2006 жылы Қазақстанның Тұңғыш Президенті Нұрсұлтан Назарбаев Қазақстан халқына жыл сайынғы жолдауында халықаралық деңгейдегі университет құру туралы ойымен бөлісті. 2010 жылғы 28 маусымда Қазақстан Республикасы Тұңғыш Президентінің қатысуымен Назарбаев Университетінің ашылу салтанаты өтті. Нұрсұлтан Әбішұлы Назарбаевтың бастамасымен 2010 жылы негізі қаланған Назарбаев Университеті әлемдік деңгейдегі зерттеу университетіне айналуды көздейтін мемлекеттің флагмандық оқу орны болып табылады. Бұл – қызметі дербестік және академиялық еркіндік қағидаттарына негізделген Қазақстандағы ең алғашқы университет. Университетке дербестік мәртебесі «Назарбаев Университеті», «Назарбаев Зияткерлік мектептері» және «Назарбаев Қоры» мәртебесі туралы» Қазақстан Республикасының 2011 жылғы 19 қаңтардағы Заңына сәйкес берілді.

2009 жылғы 25 қыркүйекте Аслан Сәрінжіпов Қазақстан Республикасы Білім және ғылым министрлігінің бұйрығына сәйкес «Астананың жаңа университеті» АҚ (бұрынғы Назарбаев Университетінің атауы) президенті болып тағайындалды. 2010 жылғы 28 қарашада Аслан Сәрінжіповтің атқару кеңесінің төрағасы болып тағайындалуын премьер-министр кеңсесінің басшысы бекітті.

Назарбаев Университеті ДББҰ Жоғарғы Қамқоршылық Кеңесінің 2011 жылғы 16 маусымдағы хаттамасына сәйкес Катсу мырза университеттің президенті болып тағайындалды.

2015 жылдың 15 маусымында Назарбаев Университеті студенттерінің алғашқы оқу бітіру рәсімі өтті. Бұл күні 446 студент бакалавриат және магистратура бағдарлама түлектері атанды.

Назарбаев Университеті Times Higher Education (THE) 2024 жылғы World University Rankings рейтингі бойынша халықаралық зерттеу университеттерінің 30 пайызының қатарына кірді. 2023 жылдың 28 қыркүйегінде жарияланған рейтингте 100-ге жуық елдің 1904 университеті бағаланды. Назарбаев Университеті 501-600 аралығындағы позицияда орналасты.

NU-да бакалавриат және магистратура бағдарламаларын ұсынатын 8 мектеп бар: инженерия және цифрлық ғылымдар мектебі; жаратылыстану, әлеуметтік және гуманитарлық ғылымдар мектебі; медицина мектебі; тау-кен ісі және жер туралы ғылымдар мектебі; жоғары бизнес мектебі; жоғары білім беру мектебі; жоғары мемлекеттік саясат мектебі; дайындық мектебі.

Барлық мектептер Колорадо тау-кен ісі мектебі (АҚШ), Дьюк университеті (АҚШ), Сингапур Ұлттық университеті (Сингапур), Ли Куан Ю мемлекеттік саясат мектебі, Кембридж университеті (Ұлыбритания), Пенсильвания университеті (АҚШ), Питтсбург университетінің медициналық орталығы (АҚШ), Висконсин-Мэдисон университеті (АҚШ), Берклидегі Лоуренс атындағы Ұлттық зертхана (АҚШ) және Оук-Ридж университетінің қауымдастығы сияқты жетекші әлемдік жоғарғы оқу орындарының, ғылыми-зерттеу институттарының және зертханаларының стратегиялық серіктестерімен ынтымақтастық орнатқан.